Soenne de bisten it oernimme yn 2025?
Yn 2025 komt der wer in foarstelling fan Theatergroep FIER.
Om dizze nije foarstelling te meitsjen hawwe wy de hulp ynroppen fan Sytse Broersma, Peter Sijbenga, Janneke de Haan en Willy van Assen. De earste trije persoanen kinne jimme fêst noch wol fan de sukses foarstelling Oeds fan Fierwei.
It nije gesicht yn dit kreatyfteam is Willy van Assen. Sy hat mei har eigen bedriuw Danswil ferskate dûnsfoarstellings makke foar jong en âld. Ek is se mei-eigner en makker by dansverhaal.nl. Peter, Janneke en Willy ha yn 2019 meardere foarstellings makke mei as tema Molke 2.0
Ut de “brainstormsessie” fan ferline simmer binne de ynbrochte ideeën foarleint oan Sytse, Peter, Janneke en Willy. Yn goed oerlis is in kar makke om, as útganspunt, de roman Animal farm fan George Orwell te brúken. De foarstelling sil seker net it ferhaal fertelle fanút it boek, mar sil wol de tema’s beljochtsje.
Wat it wurde sil, witte wy ek noch net, mar wy hawwe alle fertrouwen yn dit kreatyfteam om hjir wer in bysûndere foarstelling fan te meitsjen. Dat it in hiel oare foarstelling as Oeds fan Fierwei en de Godlike komeedzje 2.0 sil wurde, kinne wy jimme alfêst wol ferklappe.
Yn de kommende moannen sille wy jimme op de hichte hâlden.
Folgje ús op Facebook en Instagram foar it lêste nijs.
Op de foto it kreatyfteam foar 2025. Fan links nei rjochts: Sytse Broersma, Willy van Assen, Janneke de Haan en Peter Sijbenga.