Wy binne frege at wy mei ús ús teaterstik De saak De Haan meidwaan wolle oan de Gouden Gurbes, fan de Ljouwerter Krante en Keunstwurk. Dêr kinne wy fansels gjin nee tsjin sizze. Wy binne der tige grutsk op!
Gouden Gurbe nei Reduzum?
Wat soe it dochs…
Wat soe it dochs moai wêze as de minsken it ris mei-elkoar iens waarden.
Wat soe it dochs moai wêze as wy ús oardiel oer alles net allinne op emoasjes basearren.
Wat soe it dochs moai wêze as wy earst ris neitochten foar’t we wat sizze.
Wat soe it dochs moai wêze as elkenien yn Reduzum itselde tocht oer De saak De Haan.
Mar nee.
Der binne dus yn ús doarp, dêr’t we oars sa mei-inoar-ien binne, helaas, helaas, in pear minsken, dy’t der Oars Oer Tinke. Dy’t net sjogge hoe’t dizze situaasje rûnom de Haan fan Sjirk en Japke ús doarp hielendal stikken makket.
En it binne altyd deselden. Ik bedoel, dy mefrou De Morero (of hoe’t se mar hjit), it is in bêst minske. Mar se praat mei har hynder. Dus wat sy allegear mient fertelle te moatten op Facebook oer ‘De relatie tussen mens en dier’ en ‘Dat wij ons moeten openstellen voor wat de Haan ons te zeggen heeft’, dat is fansels flauwekul. En ik ha heard dat Henk Hardware ek foar de hoanne is! Ek sa’n ien dy’t him altyd drok makket oer de ferkearde dingen. Lit him om syn hert tinke, de dwaas.
Ik? Nee, ik gean der net hinne yn juny. Al dy domme sensaasje. Ik bliuw lekker thús, in bytsje poezefilmkes sjen op myn mobyl. Dat fyn IK dus leuk. En salang’t wy hjir noch yn in frij lân libje doch ik wat IK leuk fyn. Ik lês wol yn ’e Linepraat fan july hoe’t it ôfrûn is. Mei De saak De Haan.
Boeiûh.
Dêr ha je it gedonder al…
‘Ook Rijdende Rechter verdwijnt van tv door bezuinigingen bij publieke omroep’ kopt de NOS.
Sjoch, dêr ha je it gedonder al. Neffens ús is it ien grut komplot en binne it gjin “bezuinigingen”. De Rijdende Rechter wurdt ‘cancele’ omdat hy te folle dwaande is mei de rjochtspraak foar bisten.
Sa ha wy heard dat hy mei in saak De Haan ferbûn is…
Tsja, dan witte jimme it wol, dat kin net goed gean.
Wolle jimme hjir mear fan witte, kom dan nei ien fan ús foarstellings!
It kin sa net langer
Sjoch, dat mei dy hoanne fan Sjirk en Japke, dat is fansels in grut drama, al hielendal no’t Chris him sa gean litten hat op syn Instagram. Mar no hat Sjirk dus ek noch spul mei de Bouma’s. En wy hiene allegearre ferwachte dat de Bouma’s in geunstige ynfloed hawwe kinne soene op Sjirk. Mar op ien of oare wize is dêr wat misgien.
Neffens my kinne wy it oer ien ding wol iens wêze: it kin sa net langer. It ferhaal giet, dat Thomas tsjin Sjirk sein hat: “Kinst dy hoanne it bêste ôfmeitsje, dat is better foar elkenien.” Doe sei Sjirk: “Dan meitsje ik dy rothûn fan jim ôf, dy’t altyd by ús foar yn it perkje skyt.” En ik moat earlik tajaan, der lizze sa no en dan keutels yn dat perkje. Of dy keutels fan Thomas Bouma syn hûn binne, dat wit ik dan wer net, der binne fansels mear yn Reduzum dy’t te beroerd binne om de stront fan harren bisten mei in plestik pûdsje op te rêden, ik neam gjin nammen, mar jim witte wa’t jim binne.
Hoe dan ek, it is mar goed, dat de Ridende Rjochter der by komt. En it goede nijs: hy komt net yn july, nee, hy komt al yn JUNY! Dat hie ik dus even ferkeard begrepen. Mar ja, as je alles fan in oar hearre, dan hearre je it wolris ferkeard, no? Yn ’e Linepraat fan juny kitelje wy jim noch in bytsje fierder!!
*Kitelder is goed-Frysk foar teaser
De ridende rjochter komt nei Reduzum!
It is lang gjin koek en ei yn ‘e buorren, dat de ridende rjochter komt nei Reduzum! 😮 Chris reage der ek sa nuver yn om op Instagram… Wolst neat misse fan De saak De Haan, sjoch dan op ús socials en keapje foaral gau dyn kaarten! Want der kinne by de foarstellingen mar sa’n 100 minsken tagelyk wêze.